Servus a Wëllkomm bei de Lëtzebuerger Studenten zu Wien

Fir dech iwwert d’Unien zu Wien an iwwert d’Stad ze informéieren oder och méi genau iwwert eis, perséinlech Tipps a nach vill aneres gewuer ze ginn, bass du hei richteg. Wann d’Informatiounen um Site der net weiderhëllefen, kanns du eis gären eng Mail oder eis iwwert eis soziale Medie, ewéi Facebook oder Instagram schreiwen!

News

Pubquiz 2023

Den LSW Pubquiz, wou d`Memberen hiert Wëssen op d`Prouf stellen konnten, huet am dësem Semester u  18. Abrëll stattfonnt, . Am Club Berlin sinn d`Equippen géint eneen ugetrueden an missten sech unhand 4 Kategorien ënner Beweis stellen. Dobäi konnt sech d`Equipe „Old but Gold“ virun „Bendl“ an „Team Puzzles“ duerchsetzen. 

 

Beerpong Tournoi 2023

Student fir 1 Dag

Och dëst Semester huet erëm eise Beerpong Tournoi stattfonnt, bei wellechem 15 Equipe géint eneen ugetrueden sinn. Di dréi éischt kruten natierlech och en Präis. An dësem Fall war et fir déi drëtt Platz en Sixer Béier, fir déi zweet Platz Béier an Wäin an fir d`Gewënner 2 Tickets fir op eis legendär Saufest dësen Mee. Et war eng super Stëmmung an mir sinn frou, dass vill Supporter kucken komm sinn, fir d`Equipe ze ënnerstëtzen.

Den 5. Abrëll hunn mir an Zesummenarbescht mat der ACEL de Student fir 1 Dag zu Wien organiséiert. Den Dag huet ugefang mat enger Visitt an enger Virstellung vun deenen verschiddenen Uni’en. Dueno hunn mir de Schüler mat engem klengen Trëppeltour en Abléck an eng vun deenen schéinsten Stied aus Europa ginn. En gudde Maufel am Café Votiv, en leckeren Kaiserschmarrn beim Demel an en Oofschlosspatt am Bermudabräu duerften natirlech och net feelen.
Mir wëllen den Schüler Merci soen datt se dobäi waren an hoffen datt mir sie nächst Joer zu Wien kënne begréissen.

LSW Daf 2021

Dëst Joer konnt endlech rëm eis Daf stattfannen, wou eis Erstien gedeeft gi. Dëst Joer waren allerdéngs net nëmmen Erstien vun dësem Joer dobäi mee och déi vum leschten Joer, well Daf lescht Joer huet missen ofgesot gi.

Student fir 1 Dag um Belval 2021

De 7. Abrëll 2021 ware mir fir de ‚Student fir 1 Dag‘ um Belval. Obwuel dëst Event net wéi soss ofgelaf ass, huet et eis vill Spaass gemaach eis zukünfteg Erstis kennenzeléieren. Mir hoffen, datt mir hier Froe beäntwere konnten a se dat nächst Joer zu Wien begréisse kënnen!

LSW Welcome Party 2021

Eist éischt grousst Event no iwwert 1 an hallwem Joer ouni richteg Eventer, konnt dëst Semester rëm eis Welcome Party stattfannen. Vill nei Gesiichter hunn mer gesinn an mir freeën eis den Groussdeel och op eisen nächsten Eventer ze gesinn.

De Studentebal 2021

Den legendären Studentebal vun der ACEL huet dëst Joer, anescht wei soss, Enn September stattfonnt. Mir haten zesummen mat den Lëtzebuerger Studenten vun Innsbruck an Berlin een Stand, wou mir zesummen eist traditionellt Gedrénks verkaf hunn.

Assemblée générale 2021

De 7. Mäerz 2021 war eis alljärlech Assemblée générale. Opgrond vun den aktuelle Corona Moossnamen huet se leider online stattfonnt. Mir hunn eisem ale Comité fir dat lescht Joer Merci gesot. Och wann net vill Eventer organiséiert konnte ginn, hunn si trotzdeem dat Bescht aus der Saach gemaach. Zousätzlech dozou sinn de neie Comité an d’réviseurs de caisse gewielt ginn.